Urdunako Udala
16 ekaina, 2022
Ekainaren 19an, igandean, San Juan azoka ospatuko da berriz ere Urduñan, Bizkaiko urteko azokarik zaharrena eta bakarra. Bi urteko pandemiaren ostean, ekitaldiaren ohiko formatua berreskuratu du Olaran elkarteak, ganaduaren salerosketarekin, artzain txakurren lehiaketarekin eta txarol abereen lehiaketa tradizionalarekin, hain zuzen.
Azokaren aurkezpena ekainaren 16an, ostegunean, izan da, 12:30ean, Orduña Plaza Hotel Bainuetxean. Bertan, Joseba Ibarrola abeltzainak sari berezi bat jaso du bere ibilbide luze eta ahalegin handikoagatik. Gainerako sariak igandean banatuko dituzte azokan bertan.
Artzain txakurren lehiaketa larunbatean izango da, hilak 18, 18:00etan Juan de Garayko zelaietan. Bertan, Oñati, Areta, Oyardo, Zalla eta Galdameseko jatorrizko euskal artzainak lehiatuko dira.
Igandean, ekainaren 19an, azoka hartuko du Foru Plazak, bertako produktuen eta artisauen 40 posturekin. Horrez gain, txarolesa arrazaren lehiaketa eskainiko dute Gran Via kalean; ganadu salerosketaren azoka, kooperatibaren aurrean dagoen aparkalekuan; eta bazkari herrikoia, 15:00etan hasiko dena. Gainera, aurten artisautza erakustaldia ere egongo da 12 profesionalen eskutik.
‘Zilarrezko perretxikoa’
Iazko abenduan zendutako Josu Soldevilla Lamikiz musikagile urduñarrari eman diote aurten Zilarrezko Perretxikoa, ekainaren 11n, larunbatean; Olaran elkartearen hitzetan, “musikaren ikurra” izan da. Ekitaldi horretan, Sociedad Coral de Orduña abesbatzak, Felipe Ainzek, Ars Vivak eta Getxa Goi Txistu Taldeak kontzertua eskaini zuten.
Aurkezpenaren argazkiak hemen ikus daitezke → https://www.flickr.com/photos/123328124@N04/albums/72177720299842577
